Das er vil kum genas. XXXI. Als her hilthebrant das gesach. Laider im do nie geschach. Er begunden wainon sere. Vnd sprach ovwe das ich ie wart geborn. Han ich minen herren sus uerlorn. Das ich in niemer mere. Gesich dast miner vroeden slak. Sus rief er claegeliche. Er sluok zu den brusten al den tak. Sich selber creftecliche. Die klag erhort er in dem stain. Er sprach halt dich wol maister. Vnd var hin wider hain. XXXII. Wan kaem ich vs in dine phlicht. Ich moekte doch genesen niht. Vor dem grossen walle. Nuͥ tuo dich balde von dem weg. Vnd kunst du in des risen phleg. Do ruoft er zu hant mit schalle. Ist das war das du durch mich. Dis komen her ze strite. So gib ich dir min truͥwe er muͥrdet dich. Des ich dieh niht enbitte. War hain la dir bewolhen sin. Min wip vnd ovch dietheren. Den broder min. XXXIII. Her hiltebrant gie in den berk. Da vant er slaffend ainen getwerk.
pag. cod. 132.