Transkription / 1 [737

Eſore CIIII.VI überzegeen deyn ee. als vermiſchten wir vns der vnreynnigkeyt der frem den heyden diſer erde. Erzuͦrneſt du vns nitt das du vns verliereſt vntz biß das kein wurtzel gelaſſen werde vnd vnſer nam. O herre got iſrahel du biſt warhafftig. wann dye wurtzel iſt gelaſſen vntz an diſen heutigen tag. Sih nun ſeyn wir in deynem angeſiht in vnſern miſſetaten Wann es iſt nitt noch zuͦſteen vor dir in diſen. Vnd da eſdras betend bekannt. mit puluer beſtrewet. weynend vor dez tempel. da wurden geſamelt vor im auß iheruſalem gar eyn groſſe ſchar. mann vnd frawen. iüngling vnd iünglingin. Vnnd das weynen was groß in der menig Vnnd da hett geſchryen iechonias ieheli auß den ſunnen iſrahel. Eſdre ſprach. Wir haben geſündet in den herren. das wir vns geſatzt haben zuͦ der ee frembd frawen auß den heyden der erden. Vn̄ nun biſt du über alles volck iſrahel. In diſem wirdt eyn geſchworner eyd von vnſerem herren außzetriben all vnſer hawßfrawen dye auß den frembden ſeyn mit iren ſünē. Als dir geſatzt iſt vō den groͤſſern nach der ee vnſers herren. Steeauff vnd leg es auß. wann zuͦ dir hoͤrt geſchefft. vnnd wir ſeyn mit dir. Thuͦ menlich. Vnnd Eſdras ſtuͦnde auff Vnnd beſchwuͦre dye fürſten der pryeſter. vnnd die le uiten. vnd alles volck iſrahel zetuͦn nach diſen worten. vnnd ſye ſchwuͦren. Vnd eſdras ſtuͦnd auff von dez vorderſten vorhauß des tempels. vnd gieng hyn in dye ſchlaffkamer ionathe des ſuns naſabi. vnd ward da beherbergt vnnd verſuͦcht weder waſſer noch brott. über dye boßheyt der menig. Vnnd es was eyn predigen in allez land iudea vn̄ hieruſallē allen den. dye da waren auß der gefengnuß geſamelt gen hieruſalem. welcher nit zuͦlüff in zweyen tagen oder in dreyen nach dem rechten der alten ratleut. dz man dē neme alles ſein guͦt. vn̄ wurd frembd geurteylt von der menig der gefengknuß. Vn̄ es waren geſamelt alle dye da waren auß dem geſchlecht iuda vnnd be niamin in dreyen tagen in iheruſalem. Ditz iſt das newnd moned der zweyntzigeſt tag des moneds. Vnd alle menig ſaß zitterend in dem hof des tempels vmb den gegenwurtigen winter. Das III. Capitel Wie ſich die iuden die heydniſche weyber geelicht hetten. vō inne ſchye den. vnnd wie eſdras das geſetz des herren vor dem volck laſe.