Transkription / 2 [628

Euangelium Das Vnd der ſun des menſchen geet als es iſt geſchriben von im. Aber we dē menſchen. durch den der ſun des mēſchen wirt geanwurt. Guͦt wer imm das der menſch nit wer geborn. Vn̄ do ſye aſſen Iheſus nam das brott vnd geſegent es. vnd brach es. vnd gab es in. vnd ſprach. Nement. ditz iſt meyn leyb. Er nam den kelch vn̄ ſaget danck. vnnd gab in den. vnd ſye truncken all auß im. Vnd er ſprach zu in. Ditz iſt meyn blut des newen teſtaments. das do wirt vergoſſen vmb manig. werlich ſag ich euch. dz ich yetzund nit trinck von dem geſchleht des reben. vntz an den tag ſo ich in new trinck in dem reich gots. Vnd do er het geſagt dz lob. ſy gien gen auß an den oͤlperg. vnnd iheſus ſprach zu in. All werdet ir geſchēdet in mir in der nacht. wann es iſt geſchriben. Ich ſchlah den hirten. vnd die ſchaff der herde werden zerſtreut Darnach ſo ich wider erſtee. ich gee vor euch in galilea. Vnnd petrus ſprach zu im. vnd ob ſye all werden geſchendet. aber ich nit. vnd iheſus ſprach zu im. werlich ſag ich dir. das heut in diſer nacht. ee der han zwiern gibt die ſtymm. du wirdeſt mein drei ſtund verlaugnen. Vnd er redt furbas. vnd ob ich muß ſterben mit dir ich verlaugē dein nit. Vn̄ ſye ſprahē all zegleicherweyß. Vnd ſie kamē in ein doͤrflein das hieß gethſemani. vn̄ er ſprach zu ſeinen iunger. Sitzt hie biß das ich bet. Vnd er nam mit im petrum. vnd iacobum. vnd iohānē vnd er begund zeerbidmen vnd zeerſchrecken. vnnd ſprach zu in. Meyn ſel iſt betruͤbt vntz in dē tod. enthalt euch hie vnd wacht mit mir. Vnnd do er was fürgegangen ein wienig. er fiel nyder auff die erd. vnd bat. ob es moͤcht geſein. das vbergieng von im die ſtund. vnd ſprach. Abba vater dir ſind all ding müglich vbertrag diſen kelch vonn mir. Aber nit das ich will. ſunder das du wilt. vn̄ er kam vnnd fand ſye ſchlaffend. vnd er ſprach zu petro. Symo ſchleffſtu. mochteſtu nit wachen ein ſtund mit mir. wacht vnnd betet dz ir nicht get in verſuchung. Doch der geyſt iſt be reit. aber der leib kranck. Er gienng aber vnd betet das ſelb wort. ſprechend. Er kert wid̓ zum andern mal vnd fand ſy ſchlaffend. wann ir augen warn beſchwert vnd wiſſten nit was ſy im antwurten. Vnd er kam zum drytten mal vnnd ſprach zu in. Schlafft yetzund vnd ruet. es iſt genug. die ſtund iſt kumē. ſeht der ſun des menſchen wirt geantwurt in dye hende der ſuͤnder. Stet auff wir ſollen geen. ſecht der mich verret. der iſt nahend Vnnd noch da er redt. iudas ſcarioth einer von den zwelffen kam vnd vil ſchar mit im mit ſchwerten vnnd mit hoͤltzern geſandt von den oͤberſten prieſtern. vnd von dē ſchrei bern. vnd von den alten. wann ſeyn verreter gab in ein zeychen. ſagend. Welchen ich kuͦß der iſt es. halt in vn̄ furt in weyßlich. vnd do er was kumen. zehand genaht er ſich zu im vn̄ ſprach. Biß gegrüſſet meyſter. vnnd er kuͤſt in. vnd ſye legten die hend an iheſum vnnd hielten in. Vnnd einer vō dē beyſtēdē zoch auß dz ſchwert. vn̄ ſchluͦg dē knecht des oͤberſtē prieſters. vn̄ hiwe im ab ein or Iheſus antwurt. vn̄ ſprach zu in. als zu eim ſchacher ſeit ir auß gegāgē mit ſwerten vn̄ mit hoͤltzern mich zefahē. Le glich was ich lerēd bey euch imm tē