pag. cod. 130.
Sigenot. Woltent ir herren nu gedagen. Ich wolt vͥ vroemdi maere sagen. Von grosser vngeferte. Das her dietrich nie mait. Von bern vil mengen strit er straet. Vnd das in got ernerte. Do kund es nimer niemer sin ergan. Er rait dik aine von berne . Durch mengen vngefuegen tan. Das mugt ir hoeren gerne. Liep und lait im da geschach. Er sluok vil mengen tegen tot. Dar nach er eggen stach. II. Ain schilt den fuort er vor der hant. Do vant er einen wigant. Slafent in dem walte. Der was der aeller kuonste man. Der das leben ie gewan. Do erbaist der degen balde. Als ir in ferrost sach zehant. Sin huot im sere glaste. Sinen voln er sere bant. Ze aines bomes aste. Als er in under ovgen sach. Er wacht in hart vnsanfte. Des ivns das maͤre iach. III. Als in der rise ane sach. Das wort er zorneclichen sprach. Du bist der bernaere. Du fuerst den arn von loewen keln.