col. 2.
"Des muos in da belangen. Den bart den brach erm vs der hant. Do sach er sines herren. Swert hangen an der want. XXII. Als er das guote swert ersach. Lieber im do nie geschach. Sins moeht er niht gewinnen. Das truok der rise unmassen lank. Harte froelich er do sprank. Mit listeclichen sinnen. E sin der rise wurd gewar. So was er von der wende. Sins herren swert von stahel clar. Das zuht er mit der hende. Der rise im balde nach gesrait. Doch was er im endrunnen. Das was im sit her lait. XXIII. Do sprach sich maister hiltebrant. Nu wer dich grosser valant. Won es muos sin din ende. Sit du die stange hast uerlorn. Des fuerht ich klaine dinen zorn. Mit siner lingen hende. Den schilt er do fuͥr die brust nan. Dar in sluog also sere. Der rise das im das swert von dan. Niht wolte volgen mere. Er zuht das im der schiltr rieme brach. Nu mugt ir gerne hoeren. "Was wunders da beschach.