"Den lip ich noch gesunden han. Vor disen starken wurmen. Maister la din zurnen sin. Hilt mir ze lieht ich uolge. Dir an das ende min. XXIX. Do sprach maister hiltebrant. Ain vserwelter wigant. Das taet ich harte gerne. Nu wais ich laider wa ald wie. Ich vinde kaine laiter hie. Do sprach der helt von berne. Vnd wilt du haben minen rat. Sus kum ich hinnan drate. Das mir hie niemer missegat. Nie volge minem rate. Zersnide gar din guot gewant. Vnd strik an ander. Vnd gib mirs an die hant. XXX. Des aentwurt maister hilthebrant. Ain vserwelter wigant. Vnd sprach er taet es gerne. Sus zersnait er sin gewant. An an ander ers do bant. Durch den helt von berne . Das sail lies er den stain hin in. Das vie der berner schoͤne. Er sprach zuͥh of maister min. Das ich dirs iemer lone. Das sail enzwai brach als ich las. Her dietherich viel so sere.
zum Hauptmenü