Maness T. I. Seite 106. Walter von der Vogelweide Zeile: 36.
Ich sach hievor eteswenne den tag Das unser lob was gemein allen zungen Swa uns dehein lant iender nahe lag Das gerte suone oder es was betwungen Richer Gott wie wir nach eren do rungen Do rieten die alten und taten die iungen Nu krumb die rihter sint Dis bispel ist ze merkenne blint Swas nu da von geschehe meister das vint. Seite 140. Spalte: 2. Zeile: 16. Es tuot mir innecklichen we Als ich gedenke wes man phlag In der werlte wilent ê Ouwe das ich nit vergessen mag Wie rehte vro die lüte waren Do kunde ein selig man gebaren Und spilte im sin herze gegen der wunneklichen Zit Sol das iemer mer geschehen so muet mich das ichs han gesehen.