Transkription / Biblia, dt. [1001

Offenbarung cccccvii ſent jare wurden volendet. Diſes iſt die erſt aufferſteeung. Er iſt heylig vnd ſaͤlig. der do hat einen teÿl in der erſten aufferſteeung In diſen hat nit gewalt der ander tod. aber ſÿ werdē prieſter gotes. vnd criſti. vnnd werden regieren mit jm tauſent jare. Vnnd ſo tauſent jar werden volendet. ſo wirt ſathanas auffgeloͤſet von ſeinem kercker. vnd wirt außgeen. vnd wirt verfuͤren die voͤlcker. die do ſind auff den vier orten der erden. gog. vnd magog. vnd wirdt ſÿ ſamlen in den ſtreÿt. der zal als d̓ ſand des moͤres. vnnd ſÿ ſtÿgen die weÿte der erde. vnd vmbgien den die herbergen der heÿligen vn̄ die lieben ſtat. Vnd das feüer ftÿge ab von got von hȳmel. vnnd verzeret ſÿ. Vnd der teüfel der ſÿ verfuͤrt. ward gelaſſen in den ſee des feüers. vnd des ſchwebels. do auch das tÿer vn̄ der falſch weÿſſage werden gekreücziget tag vn̄ nacht in den welten der welt. vnd ich ſah einē groſſē weÿſſen thron vnd einen ſiczenden auff jm. von des angeſicht flohe der hȳmel vn̄ die erde. vnd die ſtat ward nicht funden vō jn. Vnd ich ſahe groß todten vnnd klein ſteend in dem angeſicht des throns. Vn̄ die buͤcher wurden auffgeton. vnnd ein ander buͦch ward auffgeton das da iſt des lebens. Vnd die todten wurden geurteÿlet auß den dÿngen. die do waren geſchriben in dē buͤchern nach jren wercken. Vnd das moͤre gab ſein todten. die do waren in jm. Vnd der tod. vnnd die helle gaben jre todten. die do waren in jn. vnd es ward geurteylet von allen nach jren werck en. Vnd die hell. vnd der tod wur den gelaſſen in den ſee des feüers. Das iſt der ander tode. Vnnd der nit iſt erfunden geſchriben in dem buͦch des lebens. der iſt gelaſſen in den ſee des feüers. Das xxi Capitel Nd ich ſahe einen neüen hȳmel. vnd ein neüwe erde. wann der erſt hÿmmel. vnnd die erſt erde gienghin. vnd das moͤre iſt ÿeczund nit. ¶ Vnd ich johannes ſahe die heÿligē ſtat jheruſalem. neüe abſteygend von dem hÿmmel. bereÿt von got als ein braut gezÿeret jrem mann. vnd ich hoͤret ein groſſe ſtÿm̄ vō dem thron ſagend. Seht den tabernackel go tes mit den menſchen. vnd wirdt wonen mit jn. vn̄ ſÿ werden ſein volck. vnd der got wirdt mit jn jr got. vnd got tÿlget ab alle zaͤher von jren augen. vnd der tode wirdt nit füran. noch die klage. noch das geſchreÿe. noch der ſchmercz wirdt fürbaß. Die an dem erſten ſind abgangen Vnd der do ſaß auff dem thron der ſprach. Si he. ich mach alle ding neüe) Vn̄ er ſprach zuͦ mir. Schreÿb. wann diſe wort ſind die treüiſten. vnd war. Vnnd er ſprach zuͦ mir. Es iſt geton. Ich bÿn alpha vnnd o. ein anfang vn̄ ein ende. dem dürſtenden wil ich geben vō dem brūnen des lebendigen waſſers vmb