Transkription / 2 [894

Das buch der heimlichen kein ander bürd. yedoch das ir habt das behaltet. biß das ich kum. Vnd der da uͤberwindet. vn̄ behuͤtet mey ne werck vntz an das ende. ich wird im geben den gewalt uͤber dye voͤlcker. vn̄ er wirt ſie regieren in eyner eyßnin ruͦt vn̄ ſie werden erkniſchet als ein vaß des hafners. vn̄ ich gyb im eynē morgēlichen ſtern als auch ich empfieng von meinē vater. Der da hat die orn der hoͤre was der geiſt ſaget den kirchen Das.IIIIIIII. Capitel d ſchreib dē engel der kirchen ſardis der da hat die ſiben geiſt gots vn̄ die ſiben ſtern der ſaget diſe ding Ich weiß deine werck wan̄ du haſt einen namen das du lebeſt vnnd du biſt tod Biß wachen vnd beſtete dy andern dy da waren tod wann ich find nicht deyne werck vol vor mei nem got Darūb hab in dē gemuͤt in welcherweyß du habeſt empfangen vnd gehoͤret vnnd behalte das vn̄ tuͦ buͦß. Darumb ob du nit wacheſt ich will kummē zu dir als der dieb vnd ob du wurſt nit wiſſen zu wellicher ſtund ich kumm zu dir aber du haſt wenig namē in ſardis die da nit haben vermeyliget ir gewande. Vnd ſie werdē wāderē mit mir in weiſſen kleiderē wan̄ ſy ſind ſein wirdig. der da uͤberwindet der wirdt alſo bekley det mit weyſſem gewand Vnnd ich vertylg nit ſeynen namen von dem buͦch des lebēs vn̄ ich vergih ſeinen namen vor meinem vater vnd vor ſeinen engeln Der da hat die orn der hoͤre was der geyſt ſage den kirchen Vnnd ſchreib dem engel der kirchen philadelphie. Der heilig vn̄ der war der da hat den ſchluſſel dauid der da auffthuͦt vnd nyemant beſchleuſt vn̄ der da beſchleuſt vn̄ niemāt aufthuͦt d̓ do ſagt diſe ding Ich weiß deine we rck Sih ich hab geben ein offen thuͤr vor dir die niemt mag beſchlieſſen wan̄ du haſt lützel krafft vnndhaſt be huͤt mein wort vnd haſt nitt verleu gent meinen namē Sih ich will geben von der ſynagogen ſathane dy ſich ſagen zeſein iuden vnd ſind ſein nit aber ſy liegen Sih ich mach ſy dz ſy kummē vnd anbetten vor deinen füſſen vnd werden wiſſen dz ich dich lieb hab gehabt wan̄ du haſt behalten das wort meiner gedulte. vnnd ich will dich behalten vō der ſtund der verſuͦchung. dy da iſt künfftig in allem vmbkreyß zuͦuerſuͦchen die. dy da ſeind wonen auff der erde. Sih. ich kum ſchier. das du haſt. dz behalt dz keiner neme dein kron. d̓ da überwindet. den will ich machet in eyn ſeul in dem tempel meins gots. vn̄ er wirt fuͤranhin nit außgeen. vnd ich will ſchreyben auff in den namē meins gots. vnd den namen d̓ ſtat meins gots. der newen iheruſalem. die da abgeſtygen iſt vō hymel von meim got vnd meinem newen namen. Der orn hab der hoͤre. was der geyſt ſage den kirchen. Vnnd ſchreyb dem engel der kirchen laodicie Amē der getrew zeug vnd der war. der da iſt ein anfang der geſchoͤpff gottes. der ſaget diſe ding. Ich weyß deine werck wann du biſt weder kalt noch warm Ich wolt das du wereſt kalt