Transkription / 2 [481

machabeorum ſce.V. gegen einē andern weg. Vnd als er hett auffgehoͤret zuͦ reden diſe wort do gyeng zuͦ in eyn iuͦd vor ir aller augen zuͦ opffern dē abtgoͤttern auſ dem altar in der ſtatt modin nach dem geſchefft des kuͤnigs. Vnd das ſah mathathias. vn̄ thet im wee. vn̄ ſein nyeren erbidemtē Vn̄ ſein zorn ward angezündet nach dem vrteyl des geſetzes. vnnd er ſprang an in. vnd erwurget in auff dem altar. vn̄ auch den man den der künig anthiochus het geſant. der do zwang zuͦ opffren. den erſchluͦg er auch inn der zeyt. vnd zerbrach den altar. vnd er hett groͤßlich lieb dz geſetze. als auch tett finees der ſun eleazari zambri dē ſun ſalomi. Vnnd mathathias ſchrei auß in der ſtat mit groſſer ſtymm. ſprechend ein iegklicher der do liebhat das geſetz. vnd der do ſetzet dye ee. der gee auß nach mir Vnd er floh vnd ſein ſuͦn auff die berg. vnnd ſye verlieſſen in der ſtat alles das ſie het ten Do giengen ab vill. ſuͦchend das gericht vnd die gerechtigkeyt in dye wüſte. alſo dz ſie da ſaſſen. ir ſun vn̄ ire weyber. vnd ir vih. wan̄ die uͤbel waren verhertet uͤber ſie. vn̄ es ward verkundet den mannen des künigs vnd dez heer das do was in iheruſa lem in der ſtat dauid. dz ettlich man̄ waren abgetrettē die des kuͤnigs gelot heten zerſtoͤret. in verborgē ſtett in der wuͤſte. vnd es waren nach in vil gegangen. Vnd als bald giengē ſie wider ſie. vnd machten wider ſye einen ſtreyt an dem tag der ſabbath vnd ſie ſprachen zuͦ in. widerſteet ir yetzunt vnnd noch. Geet herauß vnd thut noch dem wort des kuͦnigs anthiochi. ſo werdet ir leben. Vnd ſye ſprachen Wir woͤllen nit hynawß geen. nach woͤllē thun nach dē wort des kuͦnigs. das wir vnreinigen den tage der ſabbath. Vnd ſie erhuben wider ſie einen ſtreyt. vnd gaben in nit antwurt noch liſſen wider ſie dē ſteyn. noch verſchopten die verborgē ſtett. ſprechend. Wir woͤllen all ſter ben in vnſer einfeltigkeyt. vnnd der hymel. vnd die erde werden gezeugē über vns das ir vns vngerechtigklich erſchlaget. Vnd ſie machten wi der ſie einen ſtreyt an dem ſabbath. vnd ſie ſturben. vnd ir frawen. vnd ir ſun. vnd ir vih. vntz zuͦ tauſent ſe len der menſchen Vnd das erkandt mathathias vnd ſein frewnd. vnd ſie hetten über ſye eyn groſſe klage. Vnd der man̄ ſprach zuͦ ſeinē neſten Iſt das wir alle werden thun als gethan haben vnſer bruͤder. vn̄ wer den nit ſtreytten wider die heyden. vmb vnſer ſelen. vn̄ vmb vnſer gerechtigkeyt. ſie zerſtrewen vns alle mer den̄ bald von der erde. Vnd an dem tag gedachten ſie. ſprechēd. Ein iegklich menſch. der do kūbt zuͦ vns in dem ſtreyt an dem ſabbath wider den woͤllen wir ſtreytten. dz wir nit all ſterbē als vnſer bruͦder todt ſeyn in den verborgen ſtetten Vnd da ſa meltē ſich zuͦ im die ſamlung der iuden ſtarcker krefft auß iſrahel. eyn yegklicher williger inn dem geſetz. vnd alle die do fluhen von dē vbeln die waren in zuͦgefuget. vnnd wurden in zuͦ einer gruntueſten. Vnnd ſie ſamelten eyn heer/ vnd ſchluͦgen die ſunder in irem zorn/ vnnd dye vngerechten mann in irer vngenedigkeyt. vnnd die andern fluhen zuͦ den gebornen heyden. das ſye entwichen. Vnnd mathathias zohūb vn̄ ſein frewnd vn̄ zerſtoͤrtē dy altar